Diolch Sam…
Dyna syniad da i’m grŵp i!

Beth am hwn fel syniad da? Rydym wedi casglu ein deugain awgrym gorau o bethau i’ch grŵp eu gwneud. Edrychwch arnyn nhw a gobeithio y cewch eich ysbrydoli oherwydd pan mae’n amser cael hwyl gyda’ch ffrindiau, mae’r posibiliadau’n ddiddiwedd! Os byddwch chi’n meddwl bod rhai o’r syniadau’n rhy uchelgeisiol i’ch grŵp, yna meddyliwch am hyn: Mae pob un o’r 40 syniad rydyn ni wedi’u hawgrymu yma wedi dod o weithgareddau a phrosiectau go iawn a sefydlwyd gan grwpiau ieuenctid ledled Cymru. Roedden nhw’n gwneud iddo ddigwydd a gydag ychydig o benderfyniad a thrwy weithio gyda’ch ffrindiau, gallwch chi wneud iddo ddigwydd hefyd! Beth amdani, cewch hwyl! Siaradwch â’ch gweithiwr ieuenctid am y syniadau sy’n tynnu eich sylw chi a dechreuwch drefnu!

Y 40 uchaf: Y deugain syniad gorau i’ch grŵp

1. Beth am greu eich fforwm eich hun gyda’ch holl ffrindiau i newid pethau er gwell? Nid yn unig y bydd hwn o fudd i chi, ond i’ch cymuned hefyd.
2. Cynhaliwch eich trafodaeth eich hun ar weithgareddau sgiliau bywyd. Gall y rhain fod yn smwddio, diogelwch yn y cartref, coginio eich prydau eich hun, glanweithdra bwyd – unrhyw beth rydych chi’n ei hoffi!
3. Edrychwch ar greu eich lleoliad eich hun lle gallwch chi a’ch ffrindiau gyfarfod a bod gyda ffrindiau. Gallai hyn gynnwys pethau fel bwrdd pŵl, teledu sgrin lydan, systemau gêmau - a soffa neu ddwy!
4. Adeiladwch eich wal ddringo ar gyfer y gymuned i gyd. Bydd hon yn cynnig her gyffrous a hwyliog i bawb!
5. Codwch arian yn eich ardal a theithio i wlad arall i weithio gyda phobl ar brosiect cymorth yn y gymuned. Bydd hyn yn gwneud gwahaniaeth go iawn nid yn unig i fywydau eraill ond bydd yn gwneud i chi deimlo’n dda hefyd!
6. Beth am greu eich ffilm eich hun i ddelio â phroblemau budreddi a sbwriel yn eich ardal. Bydd hyn yn annog pobl i lanhau o’u cwmpas a gwneud eich ardal yn lle mwy diogel a iachach i fod ynddi.
7. Trefnwch ddyddiau allan i bobl ag anableddau a’u cynnwys nhw mewn gweithgareddau na fydden nhw fel arfer yn eu gwneud. Gall y rhain gynnwys pethau fel crochenwaith, paentio, marchogaeth, dringo a hyd yn oed nofio.
8. Beth am greu eich ymgyrch eich hun ar gyfer rhywbeth rydych chi wirioneddol eisiau iddo ddigwydd yn eich ardal, fel cael eich parc sgrialfyrddio pwrpasol eich hunain?
9. Ysgrifennwch eich llyfryn eich hun am rywbeth rydych chi’n teimlo’n gryf amdano a’i ddosbarthu i bobl ifanc eraill. Po fwyaf niferus y bobl fydd yn ei ddarllen, po fwyaf y bobl fydd yn dod i wybod amdano. Mae’n bosibl y byddan nhw’n cynnig eich helpu i ddarganfod dulliau i’w ddatrys.
10. Sefydlwch eich grŵp eich hun o wirfoddolwyr i greu clwb ar ôl ysgol i helpu eich cyd-ddisgyblion ac athrawon a phlant ag anghenion arbennig. Bydd hyn yn sicr yn dangos eich sgiliau arwain a gweithio mewn tîm i bawb.
11. Cynhaliwch eich noson gwobrwyo “Oscars” eich hun. Gofynnwch i bob un o’ch ffrindiau wneud eu ffilmiau eu hunain ar bynciau fel bwlio, cyffuriau, iechyd. Bydd yn rhoi gwell dealltwriaeth am y pynciau hyn i bawb a bydd yn llawer o hwyl ac yn gyfareddol hefyd!
12. Beth am sefydlu eich ardal gadwraeth eich hun a gofalu am eich amgylchedd naturiol. Gallech drwsio llwybrau a gwneud cefn gwlad yn well lle i bawb.
13. Dyluniwch eich gwefan eich hun i gasglu barn eich ffrindiau a’r gymuned yn gyffredinol. Mae’n ddull gwych o rannu syniadau a chydweithio i wneud gwahaniaeth go iawn.
14. Cynhaliwch eich noson wobrwyo eich hun i ddathlu cyflawniadau lleol. Gall hyn fod yn unrhyw beth o arddwriaeth, cyfrifiaduron, i chwaraeon a hyfforddiant ffitrwydd.
15. Ysgrifennwch a dyluniwch eich cylchgrawn eich hun i amlygu problemau pobl ifanc a dathlu cyflawniadau’r gymuned.
16. Beth am greu eich dogfen eich hun ar faterion sy’n effeithio arnoch chi a’ch ffrindiau a gwahodd pawb yn eich cymuned i ddod i’w weld? Mae’n gyfle gwych i ddweud eich barn a gwneud gwahaniaeth go iawn.
17. Trefnwch eich diwrnod gweithgareddau llawn a chynnwys eich holl ffrindiau. Gallwch gynnal gweithgareddau fel pêl droed, rygbi, nofio neu feicio. Byddwch chi’n cael hwyl ac yn cadw’n iach ar yr un pryd.
18. Dysgwch am ddiwylliannau gwahanol yn eich cymuned a gwneud ffrindiau newydd. Byddwch chi’n dysgu am fwydydd newydd, dillad ynghyd â chelf a chrefft o bob rhan o’r byd.
19. Trefnwch gêm o rygbi gyda’ch tîm lleol a chofiwch gynnwys eich ffrindiau! Gallwch werthu tocynnau i’ch ffrindiau a’ch teulu i ddod i’ch gwylio chi’n cymryd rhan hefyd!
20. Ewch i weithdy dawns yn eich ardal leol! Gall merched a bechgyn wneud hyn! Meddyliwch sut bydd eich ffrindiau’n teimlo pan fyddan nhw’n eich gweld chi’n perfformio!
21. Trefnwch gystadleuaeth dalent. Gallai fod yn debyg i “Britain’s Got Talent”. Gallwch hyd yn oed gael eich beirniaid eich hunain gyda rowndiau cynderfynol a therfynol hefyd. Bydd yn gyfle gwych i ddarganfod pethau am eich ffrindiau nad oeddech chi’n eu gwybod cyn hyn.
22. Beth am gynnal noson Karaoke a dawns eich hunain? Mae’n ddull gwych o fwynhau eich hun a chadw’n heini.
23. Beth am ffurfio eich band eich hun a mynd i chwarae mewn lleoliad ger eich cartref? Bydd yn daith gerddorol na fyddwch chi byth yn ei hanghofio a byddwch yn falch ohoni.
24. Ewch i ddiwrnod adeiladu tîm wedi’i drefnu. Bydd yn rhoi her go iawn i chi ac yn gwneud i chi feddwl mewn ffordd newydd.
25. Trefnwch ddigwyddiad codi arian neu ddau ar gyfer achos da. Bydd o fudd nid yn unig i chi ond i bobl o’ch cwmpas ac yn gwneud i chi deimlo’n dda amdanoch eich hun.
26. Ceisiwch gael gwybodaeth am sesiynau profi yn eich ardal leol. Gallwch gymryd rhan mewn llawer o weithgareddau cyffrous gan gynnwys cyfryngau digidol, paentio ac addurno a hyd yn oed sgiliau syrcas! Peidiwch ag ofni profi pethau newydd nad ydych erioed wedi’u gwneud o’r blaen!
27. Ymchwiliwch i dreftadaeth eich cymuned a chreu coeden achau. Byddwch chi’n darganfod cymaint o bethau diddorol nad oeddech chi’n eu gwybod cyn hyn. Gallwch hyd yn oed greu eich gwefan eich hun i ddangos y canlyniadau i bawb o’ch cwmpas.
28. Dysgwch sgiliau ac ymlacio! Ewch ar gwrs neu ddau i ddysgu am bethau fel sgiliau bywyd, creu CV a chael hyd i’r swydd ddelfrydol.
29. Trefnwch eich noson gwis eich hun a sicrhau eich bod yn dysgu rhywbeth! Gallwch wneud y cwestiynau mor hawdd neu mor anodd ag y dymunwch, a chael gwobrau hyd yn oed i’r tîm gorau!
30. Trefnwch eich noson ffilmiau eich hunain gydag afalau taffi, cŵn poeth a kebabs ffrwythau. Gallwch hyd yn oed gael eich twrnament Wii eich hunain a chwarae yn erbyn eich ffrindiau.
31. Byddwch yn dditectif! Gallwch gynnal noson Cluedo fawr gyda diodydd di-alcohol. Gallwch hyd yn oed wisgo gwisg ffansi i arbed cael eich adnabod!
32. Mask-erade! Dyluniwch eich masgiau eich hunain a’u gwisgo gyda balchder i’w harddangos! Gallwch gael gwobrau am y cynllun mwyaf dychmygus gyda hwyl, gêmau a disgo hefyd!
33. Cynhaliwch eich aduniad ysgol eich hunain i hel atgofion! Byddwch yn gweld ffrindiau nad ydych wedi’u gweld am amser maith a chael parti.
34. Ydych chi awydd gem o bêl ‘dodge’ neu bêl foli gyda’ch ffrindiau? Beth amdani - mae’n bosibl y byddwch yn ei mwynhau!
35. Ydych chi awydd dysgu rhai symudiadau dawns newydd ar gyfer y llain ddawnsio? Beth am fynd i ddosbarth dawnsio bol neu ddawnsio stryd a rhoi cynnig arni?
36. Methu a choginio? Ddim am goginio! Beth am drefnu eich cystadleuaeth goginio eich hun a gwneud a gwerthu byrbrydau iach gyda’ch ffrindiau?
37. Beth am gymryd rhan mewn rhaglen chwaraeon? Gallwch chwarae pêl droed am awr ac yna rhoi cynnig ar rywbeth arall o’ch dewis. Mae’n ddull gwych o ddysgu a chadw’n heini ar yr un pryd!
38. Ewch i’ch clwb ieuenctid lleol i weld beth rydych chi wedi bod yn ei golli! Gallwch gymryd rhan mewn llawer o weithgareddau cyffrous ac mae’n ddull da o wneud ffrindiau newydd.
39. Beth am fod yn lân? Cynhaliwch eich diwrnod codi sbwriel a glanhau eich hun gan wneud eich cymuned leol yn lle mwy diogel a iach i fyw ynddi. Yn sicr ddigon, dyma’r ffordd orau i wneud gwahaniaeth!
40. Trefnwch gyda’ch ffrindiau i redeg eich clwb ieuenctid lleol am ddiwrnod. Byddwch chi’n dysgu am sgiliau na wyddech oedd gennych ynghyd â dysgu mwy o rai newydd!

Dolenni Defnyddiol i Safleoedd Eraill

cwvys.org.uk

funkydragon.org.uk

cliconline.co.uk

schoolcouncilswales.org.uk

wcva.org.uk

Rydym wedi ceisio creu dolenni sy'n berthnasol ac yn addas i ddefnyddwyr ein gwefan, ond ni allwn fod yn gyfrifol am gynnwys unrhyw un o'r safleoedd hyn.